ភ្នំពេញ៖ ប្រមុខរដ្ឋាភិបាលអាស៊ាននិងសាធារណរដ្ឋកូរ៉េបានវាយតំលៃខ្ពស់ចំពោះភាពជាដៃគូនិងកិច្ចសហប្រតិបត្តិការរវាងភាគីទាំងពីរថ្វីត្បិតមានឥទ្ធិពលពីកូវីដ១៩ក្តី ដោយប្ដេជ្ញាជំរុញសេដ្ឋកិច្ចក៏ដូចជាការវិនិយោគ លើវិស័យពាណិជ្ជកម្មឲ្យមានការរីកលូតលាស់បន្ថែមទៀត ជាពិសេសជំរុញការអនុវត្តកិច្ចព្រមព្រៀងភាពជាដៃគូយុទ្ធសាស្ត្រជ្រុងជ្រោយនៃតំបន់នេះ។
ក្នុងកិច្ចប្រជុំកំពូលអាស៊ាន-កូរ៉េលើកទី២២ នៅរសៀលថ្ងៃទី២៦ ខែតុលា នេះ មេដឹកនាំប្រទេសអាស៊ានទាំង១០ និងប្រធានាធិបតីកូរ៉េខាងត្បូងលោក ម៉ូន ជេអ៊ីន បានអនុម័តទៅលើរបាយការណ៍ចំនួន៣ទាក់ទងនឹង ផែនការអភិវឌ្ឍអាស៊ាន កិច្ចព្រមព្រៀងពាណិជ្ជកម្មសេរីអាស៊ាន-កូរ៉េ និងគម្រោងកិច្ចសហប្រតិបត្តិការសេដ្ឋកិច្ចអាស៊ាន-សាធារណរដ្ឋកូរ៉េ។
ក្នុងឆ្នាំ២០២០កន្លងទៅ កូរ៉េនៅតែជាដៃគូពាណិជ្ជកម្មធំលំដាប់ទី៤នៅអាស៊ានជាប្រភពវិនិយោគទី៥នៅអាស៊ានផងដែរ។
នៅថ្ងៃនេះ កម្ពុជានិងកូរ៉េក៏បានចុះហត្ថលេខាទ្វេភាគីលើកិច្ចព្រមព្រៀងពាណិជ្ជកម្មសេរីកម្ពុជានិងកូរ៉េ ដែលរំពឹងថាកិច្ចព្រមព្រៀងនេះនឹងជំរុញកំណើននៃការនាំចេញ ផលទុនសរុបក្នុងស្រុក និងកំណើនការងារ ដែលនឹងជួយស្ដារឡើងវិញនូវសេដ្ឋកិច្ចពីផលប៉ះពាល់នៃជំងឺកូវីដ-១៩៕
